कसब्याच्या विजयात चर्चा 'मानकर पॅटर्न'ची
कसबा विधानसभा निवडणुकीत रवींद्र धंगेकर यांच्या टिकेने ऍक्टिव्ह झालेल्या मानकर समर्थकांनी रासनेंच्या प्रचारासाठी विशेष मोहीम राबविली.
Editor 
पुणे: कसबा विधानसभा मतदार संघाच्या सार्वत्रिक निवडणुकीत काँग्रेसच्या रवींद्र धंगेकरांचा पराभव करून हेमंत रासने यांनी १९ हजारांचे मताधिक्य घेत विजय मिळवला. यानंतर कसब्यात मानकर समर्थकांनी केलेल्या प्रचाराची जोरदार चर्चा रंगली आहे.
कसबा विधानसभेचा प्रचार अंतिम टप्प्यात असताना रविंद्र धंगेकरांनी राष्ट्रवादीचे शहराध्यक्ष दीपक मानकर व त्यांच्या कुटुंबावर वैयक्तिक टीकाटिप्पणी केली होती. पक्ष पातळीवर असणारी निवडणूक वैयक्तिक पातळीवर गेल्याने कसब्यात मोठ्या संख्येने असणाऱ्या मानकर समर्थकांनी हेमंत रासने यांच्या समर्थनार्थ मोहीम सुरू केली होती. भाजपचे शहर सरचिटणीस राघवेंद्र बाप्पू मानकर यांनी रवींद्र धंगेकर यांना नाव न घेता सोशल मीडियावरून दिलेल्या इशाऱ्याने मानकर समर्थकांत हवा तो संदेश गेला आणि आधीच महायुती म्हणून एकत्र असलेला मानकर गट अधिक कार्यरत झाला.
शेवटच्या टप्प्यात बाप्पू मानकरांनी आपली वेगळी यंत्रणा कार्यरत करत गेल्या वेळी अपेक्षित मताधिक्य न मिळालेल्या सदाशिव पेठ, नारायण पेठ परिसर येथे ताकद लावली व हेमंत रासने यांच्या विजयात मोठा वाटा उचलला. दीपक मानकर यांचा कसब्यात असलेला समर्थक आणि बाप्पू मानकर यांची प्रचार यंत्रणा यामुळे हेमंत रासनेंच लीड अधिकच वाढले असल्याचे मतदानाच्या आकडेवारीत दिसून आले.
